【技能】
把鐵線插進門鎖。如果計算精確，只要30秒時間，你就絕對有能力，可以打開門鎖。1，2...，26，27，咔！這次只用上27秒。苦練十年，總算沒白費。你有把握，30秒內可以開到天下間任何一把門鎖，這並不是普通人能夠做得到的。
這次為什麼選醫務所？金舖偷過，當舖爆過，每次離開，總是苦力一樣，相當辛苦，捱出個腰痛來。機緣之下，從報章看到，治療丙型肝炎的新藥，一粒膠囊已經價值1千美元，哪有什麼比爆竊醫務所更好呢？況且醫務所的保安防盜，與金舖比較，就如中門大開，毫無難度可言，正宗探囊取物。於是下定決心，闖一闖空門。
開鎖後走進去，跟著報章的名字找，很快便找到藥丸，一細袋1000顆，心中知道已值百萬美元，取了兩袋，便打算奪門而出。
才一轉身，不知何故，胸膛心口突然劇痛。再走兩步，已經痛至倒下，這刻你明白，心臟病找上了你。看著滿牆的藥丸，你知道救命藥就在其中；可是，你更了解，自己沒有能力找到合適的。走到盡頭才發現，十年光境，完全浪費在沒有意義的技能上。或許...或許...就在你閉上眼睛前，最後看見的，會是本教授治療心臟病的書籍；不過，你已經不會再有時間去研習這項技能...
***************************
可能剛剛晚餐飲了太多紅酒，James今晚特別狂放，一推開門，他便把我拉了入去，燈還未開，他的手已經不規矩地在我身上遊走。
「咪啦！開燈先啦～」
我一開燈，眼前的景物嚇了我一跳。地上平躺著一個陌生人，面上出現極痛苦的表情。
「我見過佢！下午黎過睇肚痛！喂James，佢仲有心跳㗎！你快啲黎救佢啦！」
「等等... 佢手入面果啲，咪係丙型肝炎藥？佢係賊黎㗎。」
「賊又點，James你係醫生黎㗎，快啲救人先啦！」
James走上前看了一看，正要去找藥，卻呆住停手了。
「做咩，佢未死喎，佢隻眼仲郁，仲望住我... 做咩停晒手？」
「佢拎左兩包肝炎藥...」
一陣沉默，診所只餘下我們三人急速的呼吸聲。我在診所負責藥物採購，當然清楚發生什麼事。藥廠那邊擔心我們負擔不起，從來只給過我們一包肝炎藥，而小偷今晚卻取了兩包。
「佢個人都算有良心，仲留一包係櫃唔拎，比我地醫人，呢啲係咪叫盜亦有盜？哈哈！」
我沒有James那種冷靜，只能繼續不發一語。過了片刻，我看著他漸漸變弱的呼吸，忍不住開了口，「咁點好？唔救佢？」
「如果救，他被人拉左嘅話，落口供話拎左兩包藥，我地點解釋？我們自己啲聲譽呢？」
我控制不了淚水。「由佢去？」
「咩都唔好理，我收埋啲藥先。之前警察咪有份防盜指引？跟佢地程序咁做，報警call警察。」
「下？call警察？佢心臟病，應該叫救護車喎...」
「跟程序，我地實無錯。況且，我睇佢過多兩分零鐘都應該救唔返，到時無佢口供，無人知我地賣假藥。Take it easy，你係護理學校，無見過病人死咩？唔怕，我黎錫返你。」
我無力推開他的手，不論James怎樣吻我，我的眼睛也無法離開小偷的眼眶。十五分鐘內，我一秒一秒地看著他的眼睛，由有神變濁白...
「係咪？都話無事啦，啱啱好，差人到。記得話我地入黎已經見佢係咁呀！」
「James，到底我地讀咁多書，學到咩？」
「傻女，我地咪學到自己救自己嘅技能囉，佢就唔識lu。」
自此之後，我沒有再回診所，過了一周，我找了個天台，跳了下去。在落地的一瞬，我彷彿看見那個小偷，倒過頭來看著我的眼睛，由有神變濁白。
Search